སྐབས་གསུམ་པའི་དཀའ་བཅུ་སྨན་པ་ཚད་ལྡན་གསོ་སྐྱོང་སྨན་ངོ་ངོས་འཛིན་གྱི་བྱ་བ་ལེགས་འགྲུབ་བྱུང་།

སྤྱི་ལོ་༢༠༢༡ལོའི་སྤྱི་ཟླ་༧པའི་ཚེས་༡༥ཉིན་ནས་བཟུང་ཉིན་བཞིའི་རིང་ལ་མཚོ་སྔོན་ཞིང་ཆེན་བོད་ལུགས་སྨན་ཁང་གི་བཀོད་སྒྲིག་ལྟར།དཀའ་བཅུ་སྨན་པ་ཚད་ལྡན་གསོ་སྐྱོང་ཁོངས་སུ་གཏོགས་པའི་སྨན་པ་བདུན་ཅུ་ལྷག་རང་སྨན་ཁང་གི་མཛུབ་ཁྲིད་དགེ་རྒན་དག་དང་ལྷན་དུ་ལྕང་ར་ལུང་པར་སྨན་ངོ་ངོས་འཛིན་ལ་སོང་།  

དཀའ་བཅུ་སྨན་པ་ཚད་ལྡན་གསོ་སྐྱོང་སྨན་པ་དག་ཚོ་ཆུང་བདུན་ཏུ་བགོས་ཏེ་རང་རང་གི་མཛུབ་ཁྲིད་དགེ་རྒན་རྣམས་ཀྱིས་སྣེ་ཁྲིད་དེ་མཚོ་ངོས་ལས་མཐོ་ཚད་རྨི་༤༠༠༠ཡན་གྱི་རྒོད་རྩེ་རི་ལ་ཆས་ཏེ་རི་སྐྱེས་སྨན་སྣ་བདུན་ཅུ་ལྷག་དང་། དམའ་བ་ཞིང་ཁུག་དང་ནགས་གསེབ། ལམ་འགྲམ་བཅས་སུ་བསྐྱོད་ནས་ཞིང་སྐྱེས་སྨན་སྣ་བཞི་བཅུ་ལྷག་གི་ངོས་འཛིན་དང་ནུས་པ། སྦྱོར་བ་གང་དུ་གཏོང་ཚུལ་སོགས་ངོ་སྤྲོད་ཞིབ་མོར་གནངས།  

ཚེས་༡༧ཉིན་གྱི་ཕྱི་དྲོར། དཀའ་བཅུ་སྨན་པ་ཚད་ལྡན་གསོ་སྐྱོང་སྨན་པ་དག་གི་གཞུང་ལུགས་དང་ལག་ལེན་དངོས་ཀྱི་སྨན་ངོ་ངོས་འཛིན་གསལ་བར་འབྲེལ་ཆེད།སྨན་སྣ་བརྒྱད་ཅུའི་དམར་དཔེ་བསྒྲིག་སྟེ་སྨན་ངོའི་རྒྱུགས་བཤེར་མཛད་པ་དང་། སྨན་གྱི་ནུས་པ་རྐྱང་སེལ་བློར་རྒྱུགས་བླངས། 

མཇུག་མཐར།མཚོ་སྔོན་སློབ་ཆེན་བོད་ལུགས་གསོ་རིག་སློབ་གླིང་གི་དགེ་རྒན་ཆེན་མོ་ཙི་བྷ་ལགས་གདན་དྲངས་ནས་སྨན་སྣ་བརྒྱད་ཅུའི་ངོས་འཛིན་དང་བྱང་ཟུར་ལུགས་གཉིས་ཀྱི་སོ་སོའི་ངོས་འཛིན་དང་ཁྱད་པར་གྱི་ནུས་པ་བཅས་ཞིབ་རྒྱས་ངོ་སྤྲོད་གནང་བ་དང་།དགེ་རྒན་རིག་འཛིན་རྡོ་རྗེ་ལགས་ཀྱིས་སྨན་པ་ཡོངས་ལ་རྒྱལ་སྨན་ཆེན་མོ་ཨ་ཁུ་ཉི་མ་ལགས་ནས་བརྒྱུད་པའི་སྨན་ངོ་ངོས་འཛིན་བྱེད་ལུགས་དང་། བོད་སྨན་འཕེལ་རྒྱས་ཐད་ཀྱི་བཀའ་སློབ་དང་རེ་བ་བཏོན། 

དགེ་རྒན་ཀླུ་རྒྱལ་གྱིས་སྔོ་ཡི་བུ་མོ་སྤུན་བདུན་གྱི་རྟོགས་བརྗོད་སྙན་པའི་གླུ་རུ་དྲངས་བས་དགེ་སློབ་ཡོངས་ཀྱི་ཡིད་དབང་ཅིག་ཅར་ཏུ་འཕྲོག 

མཐར་སྨན་ངོའི་རྒྱུགས་བཤེར་ཁྲོད་བྱ་དགའ་ཐོབ་མཁན་རྣམས་ལ་རང་སྨན་ཁང་གི་འགོ་གཙོ་གཞོན་པ་པདྨ་རབ་བརྟན་ལགས་ཀྱིས་གཟེངས་བསྟོད་དང་སྐུལ་ལྕག་གི་རྟགས་མ་གནང་སྟེ་ཐེངས་འདིའི་བྱ་འགུལ་བཀྲ་ཤིས་པའི་ངང་མཇུག་བསྡུས། 

ཐེངས་འདིའི་སྨན་ངོ་ངོས་འཛིན་གྱི་སློབ་སྦྱོང་བརྒྱུད་དཀའ་བཅུ་སྨན་པ་ཚད་ལྡན་གསོ་སྐྱོང་སྨན་པའི་ཡུལ་དངོས་ཀྱི་སྔོ་སྨན་ངོས་འཛིན་དང་འཐུ་སྒྲུབ་ཀྱི་ཆུ་ཚད་མཐོ་རུ་ཕྱིན་ཅིང་སྨན་སྦྱོར་ཁྲོད་སྨན་རྫས་ཀྱི་རྩ་ལོ་མེ་འབྲས་ཇི་ལྟར་གཏོང་བའི་རིགས་ལམ་ཇེ་ཟབ་ཏུ་བཏང་སྟེ་ནད་ཐོག་བསམ་གཞིགས་དང་ལག་ལེན་དངོས་ལ་རམ་འདེགས་ཀྱི་ནུས་པ་མི་དམན་པ་ཐོབ།