ཨེ་མ་རྨད་བྱུང་།

------༢༠༢༢ལོའི་མཚོ་སྔོན་ཞིང་ཆེན་བོད་ལུགས་སྨན་ཁང་གི་སྨན་ངོ་སྐབས་སོ་དགུ་པའི་ཡུལ་དངོས་ཀྱི་མཐོང་སྣང་།

གནུབས་དོན་གྲུབ་ཚེ་རིང་།

ཤར་ན་ཙོང་ཁ་ཁྱུང་གི་རི་བོ་ཆོས་སྲིད་མཐོ་བའི་རྟེན་དུ་བརྗིད།།

ལྷོ་ན་རྨ་ཀླུང་དལ་འབབ་རིང་མོ་སྐྱེ་འགྲོའི་སྲོག་གི་གསོས་སུ་འབབ།།

ནུབ་ན་མཚོ་ཆེན་ཁྲི་ཤོར་རྒྱལ་མོ་མདོ་སྨད་མཛེས་པའི་རྒྱན་དུ་འཁྱིལ།།

བྱང་ན་མཁས་དགུའི་དྲེགས་པ་ཟིལ་གནོན་ཙོང་ཁ་པ་སོགས་འཛམ་གླིང་རྒྱན།།

དགེ་མཚན་རང་བྱུང་ལྷུན་གྲུབ་ཡོད་དོ་ཨེ་མ་རྨད་བྱུང་བསྐལ་བ་བཟང་།།

ཕྱི་རུ་བཀོད་པ་ངོ་མཚར་འབུམ་ལྡན་སྐབས་གསུམ་གནས་པ་ལྷ་ཡི་གྲོང་།

ནང་དུ་འཚོ་བྱེད་སྟོང་གི་འདུ་འགོད་ཕྱི་ནང་དྲང་སྲོང་ཆེན་པོའི་ལུགས།།

གསང་བ་ལག་ལེན་མན་ངག་རྣོན་པོ་ནད་ཀྱི་གཡུལ་ངོར་རྭ་ལྟར་གཟེངས།།

མི་འདོད་འཆི་བ་བཤོལ་ལ་འདེབས་མཁན་ལྷ་ཡི་ཕོ་ཉ་རྗེ་ཡི་མགོན།།

འདུས་པ་སྨན་གྱི་གྲོང་ཁྱེར་གཉིས་པ་ཨེ་མ་རྨད་བྱུང་བསྐལ་བ་བཟང་།།

ཤུག་ལོ་འབར་བའི་དུད་པའི་སྤྲིན་གྱིས་ཞིང་གི་དམེ་གྲིབ་དག་པར་བསང་།།

དངོས་བཤམ་ཡིད་སྤྲུལ་མཆོད་པ་དམ་པས་ཡུལ་སྐྱོང་ལྷ་ཡི་ཐུགས་དམ་བསྐངས།།

བསྟན་རྒྱས་སྨོན་ལམ་དག་པའི་དབྱངས་ཀྱིས་བྱིང་རྨུགས་ཏིང་འཛིན་གཉིད་ལས་བསླངས།།

སྲོལ་གྱི་རྒྱུན་ལམ་སྤོབས་པས་གཤེགས་པ་གངས་རི་སྐྱོང་བའི་རིགས་ཀྱི་བུ།།

ལྕང་རྭ་སྨུག་པོའི་ལྗོངས་སུ་འཛོམས་པ་ཨེ་མ་རྨད་བྱུང་བསྐལ་བ་བཟང་།།

ཞིང་དུ་གུར་ཀུམ་སྨན་གྱི་ལྗོན་པ་མི་ཡི་གཟུགས་སུ་སྐྱེས་སྟོབས་མཚར།།

བྲག་དང་གཞོངས་སུ་མཁན་ཆུང་དངུལ་ལོ་གསེར་གྱི་མགོ་ཅན་དྲི་བསུང་ངད།།

རྫ་ན་ལྷོག་འདུལ་ད་བྱིད་དཀར་པོ་བྱ་རྒོད་རྫ་ལ་བབས་པ་འདྲ།།

གཡའ་དང་ཞོལ་དུ་ཧོང་ལེན་ཨུཏྤལ་ཆུ་མའི་ཞིང་ལ་བཏབ་པ་བཞིན།།

སྨན་ཀུན་གདགས་སྲིབས་སྐྱེ་སར་སྐྱེ་བ་ཨེ་མ་རྨད་བྱུང་བསྐལ་བ་བཟང་།།

སྟོད་ཀྱི་གཡའ་ཤག་གོར་མའི་གསེབ་ཀྱི་སྨན་གྱི་སྐྱེས་གཟུགས་མིག་ལ་བཤེར།།

སྤང་གི་ཆུ་མིག་བརྡོལ་སའི་འགྲམ་གྱི་མེ་ཏོག་མང་པོ་སྣ་ལ་གླན།།

སྨད་ཀྱི་འབྲས་ལྡན་བྱུ་རུའི་དོག་པ་ལྗགས་འདབ་རྣོན་པོའི་ཁུགས་སུ་བླངས།།

སྐོར་དང་ཁྱུ་བྱས་སྲོལ་བཟང་དོགས་དཔྱོད་བདེ་ལྕག་འཁྱུག་པའི་ངག་རིག་གིས།།

ཕུ་ནུ་མིང་སྲིང་གཅིག་ཏུ་བསྒྲིལ་པ་ཨེ་མ་རྨད་བྱུང་བསྐལ་བ་བཟང་།།

སྟག་ཤར་གཞོན་ནུ་གྲུང་པོའི་ཡིད་མཁར་དགེ་མཚན་དཔྱོད་རིགས་སྐྱ་རེངས་ཤར།།

སྨན་ཤར་བཞིན་བཟང་སྙིང་གི་སྦུབས་སུ་གཞན་ཕན་ཐུགས་བསྐྱེད་སྲོག་རླུང་གཡོས།།

མགོ་སེ་གེལ་པོའི་ཐོད་པའི་ངོས་སུ་ཡིད་ཁེངས་རེ་ཁའི་གཉེར་རིས་བབས།།

རུ་འདྲེན་དཔོན་འཁོར་དམ་པའི་གཤིས་ལ་སྤྱི་ཕན་སྒམ་དཀྱེལ་བློ་ཆེ་བའི།།

དགའ་བའི་རྟེན་འབྲེལ་གཟུགས་སུ་ཤར་བ་ཨེ་མ་རྨད་བྱུང་བསྐལ་བ་བཟང་།།

ལ་ལས་གཞུང་མང་རིགས་པ་སྤྲད་དེ་སྨན་གྱི་གྲངས་སྒོ་རྒྱ་ཆེར་དབྱེ།།

ཁ་ཅིག་སྙན་བརྒྱུད་གདམས་པའི་ཚིག་གིས་ལུགས་ཀྱི་སྤྲོས་པ་རྗེན་པར་བརྡལ།།

མང་པོས་རྣམ་དཔྱོད་འོད་དུ་འགྱུ་བཞིན་སྣ་ཚོགས་དོན་ལ་རྟོག་ཅིང་གཞིགས།།

ཆེན་པོ་རེངས་པོའི་ཐ་ཚིག་མེད་པར་གུ་ཡངས་ངག་གི་བགྲོ་གླེང་པའི།།

རང་དབང་རིགས་ཤེས་ཐོལ་དུ་འཕྱུར་བ་ཨེ་མ་རྨད་བྱུང་བསྐལ་བ་བཟང་།།

མཚམས་རེར་ཆར་ཟིམ་དྭངས་མའི་དོག་པས་སྔོ་སྐྱེ་ཟེ་བའི་ས་རྡུལ་སྤྲུགས།།

སྐབས་རེར་ཉི་གཞོན་ཟེར་མའི་འོད་ཀྱིས་ས་ཡི་བཞིན་ལ་བཀྲག་མདངས་བྱིན།།

ལོ་མའི་སྣེ་དང་གང་བུའི་ཞབས་སུ་བདུད་རྩི་ཟིལ་བའི་ཐིགས་པ་འཛིན།།

སྨན་གྱི་དྲི་བསུང་སྤོས་ཀྱི་ངད་བཞིན་སྣ་ལ་ལྷུང་བའི་དག་པའི་ཞིང་།།

ང་ཚོ་རྩེད་རའི་སྣོད་དུ་ཆགས་པ་ཨེ་མ་རྨད་བྱུང་བསྐལ་བ་བཟང་།།

ནང་གཞིས་མཛའ་བའི་ཞེ་གཏམ་སྨར་པོ་སྙིང་ནས་སློང་པའི་ཞལ་རྩེད་ཀྱང་།།

དོན་ལྡན་བརྗོད་པ་སྙན་ངག་ཉིད་དུ་ལེགས་པར་གྲུབ་པས་བློ་བག་དྲོ།།

ཟོག་སྟོང་ངག་ཁྱལ་ཡན་ལག་ལྔ་ཅན་ཟབ་མོའི་གཞུང་ལ་དབང་ཟ་བ།།

མེད་པར་མྱི་ཚུལ་ལས་ལམ་དྲང་བོ་གཏན་ཏུ་སྐྱོང་བའི་རིགས་ཀྱི་གྱད།།

བསྟན་པ་འཛིན་པའི་དཔལ་དུ་བྱོན་པ་ཨེ་མ་རྨད་བྱུང་བསྐལ་བ་བཟང་།།

ཤེས་རབ་ལོ་མའི་འཕྱོར་སྒེག་རྗེས་ཀྱི་སྔོ་ཡི་བུ་མོ་སྤུན་བདུན་མར།།

གཞོན་ནུ་མང་པོས་སྲེད་པའི་སྤོབས་པ་མངོན་དུ་གྱུར་ཏེ་ལག་པ་ཡིས།།

སྙོབ་བཞིན་གསང་བའི་མཆིད་ཀྱིས་བགྲོ་བཞིན་གྲལ་ལ་བསྟར་ཏེ་དཔྱོད་པ་ཡི།།

གོ་བསེད་ཉམས་ལ་བལྟས་ཀྱིན་བསམ་གྱིན་ཡིད་ཀྱི་དང་བ་འཕྱོ་བར་བྱེད།།

ཕ་ཤུལ་བུ་ལ་རེ་བའི་འབྲས་ལྡན་ཨེ་མ་རྨད་བྱུང་བསྐལ་བ་བཟང་།།

རིང་བའི་ཕུགས་ལ་མིག་དབང་རྣོན་པོས་རིག་རིག་ཅེར་ཏེ་འཚོལ་ཞིང་དཔྱད།།

ཉེ་བའི་ཚིག་ལ་ཡང་ཡང་བརྟག་སྟེ་སྙིང་བོའི་སྙིང་པོ་བློ་ལ་བླངས།།

ཡིན་མིན་སྐྱོན་ཡོན་བླང་དོར་ཕྱེད་ལ་ལོག་པའི་གོལ་སར་མ་ཤོར་བའི།།

རཱ་ཛཱ་ཧཾ་སའི་ཡུལ་འཛིན་བློ་ཡིས་སོ་སོར་འབྱེད་ལ་རྗེས་ཞུགས་པའི།།

བློ་ལྡན་མཁའ་ལྡིང་སྟོབས་ཀྱིས་འཕྱོ་བ་ཨེ་མ་རྨད་བྱུང་བསྐལ་བ་བཟང་།།

ཕྱི་ནང་འབྱུང་བར་འཕེལ་འགྲིབ་བྱུང་སྟེ་བློ་ཡི་མི་ཟིན་འགྱུར་ལྡོག་གིས།།

རང་བྱུང་སྨན་རྫས་གནས་སྟོང་གསར་བྱུང་གཏན་དུ་མི་གནས་འགྱུར་བ་ཡི།།

རྟེན་ཅིང་འབྲེལ་འབྱུང་ཆོས་ཅན་འདི་ཡིས་རྫས་ཀྱི་རོ་ནུས་ཡོན་ཏན་ཀུན།།

དམད་ཅིང་བསྒྱུར་བས་ཤག་ཤིག་རྩིང་བོར་ལེགས་ཉེས་སྟངས་འཛིན་ལུང་སྟོན་པའི།།

རྗེས་དཔག་རྣོན་པོའི་བློ་ལྡན་གྲངས་མེད་ཨེ་མ་རྨད་བྱུང་བསྐལ་བ་བཟང་།།

དྲང་སྲོང་ཆེན་པོའི་མཛད་པ་སྐྱོང་བའི་འཚོ་བྱེད་སྟོང་གི་ཁ་འཛིན་ལ།།

སྨན་གྱི་བླ་མས་བྱིན་རླབས་ཆར་ཕོབས་ཞང་བློན་སྡེ་དགུས་གྲོགས་དན་མཛོད།།

ཚེ་བསོད་རླུང་རྟའི་ཁ་ལས་རབ་དགེ་གཞན་ཕན་སེམས་ཀྱིས་རྒྱུད་རབ་བརླན།།

འགྲོ་མང་སྲོག་གི་རྒྱུན་ཐག་མི་ཆད་ཆོས་ནོར་བདེ་བའི་དཔལ་རྒྱས་པའི།།

བཀྲ་ཤིས་དམ་པ་མི་ནུབ་ཡུན་བརྟན་གསོ་རིག་བསྟན་པ་དར་གྱུར་ཅིག། 

  ཅེས༢༠༢༢ལོའི་མཚོ་སྔོན་ཞིང་ཆེན་བོད་ལུགས་སྨན་ཁང་གི་སྨན་ངོ་ངོས་འཛིན་གྱི་དཔལ་དང་སྟོབས་དང་རྣམ་པས་ཡིད་རབ་ཏུ་དྲངས་ཤིང་དགའ་བས་བརྟས་པ་ཇི་བཞིན་དུ་ཚིག་གི་བཅད་པར་སྟབས་པོར་བགྱིས་ཏེ་ཙོང་ཁ་རི་བརྒྱུད་ཀྱི་ལེ་ལག་རྒོད་རྩེ་རྫ་འདབ་ནས་གུས་པས་ཕུལ་ལོ།།