༄༅།། ཞིང་ཆེན་བོད་ལུགས་སྨན་ཁང་གི་དཀའ་བཅུ་སྨན་པ་ཚད་ལྡན་གསོ་སྐྱོང་སློབ་མའི་སྨན་ངོ་ངོས་འཛིན་སྐབས་ལྔ་བ་རྨ་ཡུལ་ཁྲི་ཀའི་མགོན་རྒྱ་རུ་སྤེལ།

༢༠༢༣ལོའི་ཟླ༧ཚེས༦ཉིན་ནས་ཚེས་༨ཉིན། ཞིང་ཆེན་བོད་ལུགས་དཀའ་བཅུ་སྨན་པ་ཚད་ལྡན་གསོ་སྐྱོང་སློབ་མའི་སྐབས་ལྔ་བའི་སྨན་ངོ་ངོས་འཛིན་གྱི་བྱ་འགུལ་ཁྲི་ཀ་མགོན་རྒྱ་རུ་སྤེལ། ཐེངས་འདིའི་སྨན་ངོ་ངོས་འཛིན་ལ་སྨན་སྤྱི་གཞོན་པ་པདྨ་རབ་བརྟན་གྱིས་སྣེ་ཁྲིད་དེ་སྨན་ཁང་ཡོངས་ཀྱི་ནད་ཐོག་ཚན་ཁག་སོ་སོའི་དཀའ་བཅུ་སྨན་པ་བརྒྱ་ལྷག་ཞུགས།

ཞིང་ཆེན་དཀའ་བཅུ་སྨན་པའི་ཚད་ལྡན་གསོ་སྐྱོང་སློབ་མ་རྣམས་ཀྱིས་སྨན་ངོ་ངོས་འཛིན་གྱི་གོ་རིམ་ཁྲོད་དུ་རང་རེའི་གསོ་བ་རིག་པའི་གཞུང་ཆེན་ཀུན་གྱི་ཕྱི་མོར་གྱུར་པ་དཔལ་ལྡན་རྒྱུད་བཞིའི་དགོངས་དོན་གཞིར་བཟུང་སྟེ།  སྔོ་སྨན་རེ་རེའི་ངོས་འཛིན་མི་འདྲ་བ་དང་ཆགས་ལུགས། དྲི། རོ། ཁ་དོག སྐྱེ་གནས་སོགས་ལ་ཡུལ་དངོས་ནས་སློབ་སྦྱོང་བྱས་པར་མ་ཟད།   རྒན་རྣམ་པར་བཀའ་འདྲི་བྱས་ཏེ་སྨན་དུ་སྦྱར་བྱ་དང་སྔོ་ཆོལ་དུག་འདོན་སོགས་ཀྱི་ཐད་ནས་དོགས་གཞི་བསལ།

རྒྱུགས་བཤེར་མཇུག་རྫོགས་རྗེས་ཞིང་ཆེན་སྨན་ཁང་གི་རྒན་རིག་འཛིན་རྡོ་རྗེ་ལགས་ནས་སྨན་རྫས་ཀྱི་དམར་དཔེ་དག་ཞིབ་ཆ་དང་བཅས་སློབ་གྲོགས་ཀུན་ལ་ངོ་སྤྲོད་རྒྱས་པར་མཛད་ལ། ཁོང་གིས་བྱང་ཟུར་ལུགས་གཉིས་དང་། གནའ་དེང་གི་སྨན་ངོ་ངོས་འཛིན་ཚུལ་མི་འདྲ་བའི་ཐད་ནས་ཀུན་ལ་མཛུབ་སྟོན་གསལ་བོ་གནང་།

ཟླ༧པའི་ཚེས༨ཉིན་གྱི་སྔ་དྲོར། སྔོ་སྨན་དམར་དཔེ་བརྒྱད་ཅུ་དང་འབྲུ་སྨན་བཅུ་ཡི་སྨན་ངོ་ངོས་འཛིན་གྱི་རྒྱུགས་བཤེར་བྱས་པ་དང་།  རྒྱུགས་བཤེར་གོ་རིམ་ཁྲོད་སློབ་མ་རྣམས་ཀྱིས་སྨན་གྱི་ཆགས་དབྱིབས་དང་དྲི། རོ། ཁ་དོག་སོགས་ལ་བརྟེན་ནས་སྨན་ངོ་ངོས་འཛིན་བྱས་ཏེ་ཉིན་གཉིས་རིང་གི་སློབ་སྦྱོབ་འབྲས་བུ་རྒྱུགས་སྤྲོད་ཞུས།

ཟླ༧པའི་ཚེས༨ཉིན་གྱི་ཕྱི་དྲོ། ཐེངས་འདིའི་སྨན་ངོ་ངོས་འཛིན་བྱ་འགུལ་གྱི་སྤྱི་སྡོམ་ཚོགས་འདུ་འཚོགས་པ་དང་། ཚོགས་ཐོག་ཏུ་ཐེངས་འདིའི་སྨན་ངོ་ངོས་འཛིན་གྱི་རྒྱུགས་བཤེར་ཁྲོད་གྲུབ་འབྲས་དཔེ་ལེགས་ཐོབ་མཁན་གྱི་སློབ་གྲོགས་ཚོ་ཨང་རིམ་གསུམ་དུ་དགར་ཏེ་སློབ་གྲོགས་དྲུག་ལ་གཟེངས་བསྟོད་བྱ་དགའ་དང་། གཞན་མཛུབ་སྟོན་དགེ་རྒན་གསུམ་ལ་ཕུལ་བྱུང་མཛུབ་སྟོན་དགེ་རྒན་གྱི་བྱ་དགའ་བཅས་གནང་།

སྨན་ངོ་ངོས་འཛིན་གྱི་མགོ་མཇུག་བར་གསུམ་དུ་དཀའ་བཅུ་སྨན་པ་ཚོས་དུས་རྒྱུན་ནད་ཐོག་སློབ་སྦྱོང་གི་སྐབས་སུ་སློབ་མི་ཐུབ་པའི་ཤེས་བྱ་བློ་ཡིད་ཚིམ་པ་ཞིག་དང་།   སྨན་རིགས་ངོས་འཛིན་དང་འདུལ་སྦྱོང་བྱེད་ཐབས་སོགས་ལའང་སློབ་སྦྱོང་ཀྱི་སྐལ་བ་མི་དམན་པ་ཞིག་ཐོབ་པས་ཀུན་ནས་སྤྲོ་ཞིང་དགའ་བའི་ངང་མཇུག་སྒྲིལ།