སྤྱི་ཟླ༨པའི༡༥ཉིན། མཚོ་སྔོན་ཞིང་ཆེན་བོད་ལུགས་སྨན་ཁང་ནད་ཐོག་སློབ་སྟོན་ཚན་ཁག་གིས་དཀའ་བཅུ་སྨན་པ་ཚད་ལྡན་གསོ་སྐྱོང་རྟེན་གཞིའི་དཔེ་ཀློག་ཁང་གི་མུ་འབྲེལ་འཆད་ཁྲིད་སྐབས་ཉེར་བཞི་བ་སྤེལ།  

ཐེངས་འདིའི་འཆད་ཁྲིད་སྟེང་ཞིང་ཆེན་བོད་ལུགས་སྨན་ཁང་གི་སྨན་པ་འབུམ་རམས་གཞོན་པ་རིན་ཆེན་དོན་གྲུབ་ལགས་གདན་ཞུས། ནད་རྣམས་ཀུན་གྱི་་རྒྱུ་ནི་མ་ཞུ་བར་གྱུར་ཚུལ་དང་དེའི་བརྟག་བཅོས་རིགས་ལམ་སྐོར་ནས་འཆད་ཁྲིད་གནང་།

རྒན་ལགས་ནས་སྡེ་བཞི་གཅོང་གི་རྩ་བ་མ་ཞུ་བ་དེ་ནད་རྣམས་ཕལ་ཆེར་གྱི་རྒྱུ་རུ་གྱུར་ཚུལ་དང་དེའི་བརྟག་བཅོས་རིགས་ལམ་སོགས་བོད་ལུགས་གསོ་རིག་གི་གཞུང་དོན་དངོས་དང་འབྲེལ་ཏེ་ཟས་སྐོམ་སོགས་ཀྱིས་མེ་དྲོད་ཉམས་ནས་མ་ཞུ་བ་བསྐྱེད་ཚུལ་དང་མ་ཞུ་བའི་དབང་གིས་འབྲས་བུ་གཅོང་ནད་གསར་རྙིང་བསྐྱེད་ཚུལ། ཁོང་ནད་ཀུན་ལ་ཕོ་བ་གཙོ་བོར་བཅོས་དགོས་པ་དང་ཕོ་བ་ཞིང་ས་འདྲ་བས་མེ་དྲོད་གསོ་དགོས་ཚུལ་སོགས་རིག་པའི་གཞུང་ལུགས་གཞིར་བཟུང་ནས་མ་ཞུ་བའི་ནད་གསོ་བ་གཅེས་པར་གདམས་པ་ལྟར་དཔལ་ལྡན་རྒྱུད་བཞི་ལས། རྒྱུ་མ་བཅོས་པར་འབྲས་བུ་གསོ་འདོད་པ། །དུག་རྩ་མ་ཕྱུང་ལོ་མ་བཅད་སྐྱུར་འདྲ། །ཁོང་ནད་ཐམས་ཅད་མ་ཞུས་སྐྱེད་པའི་ཕྱིར། །མ་ཞུའི་གསོ་དཔྱད་མཁས་པ་ཤིན་ཏུ་གཅེས། །རྒྱུ་ཉིད་གྲོལ་ན་འབྲས་བུ་ག་ལ་འབྱུང་། །ཞེས་པར་བོད་ཀྱི་གསོ་དཔྱད་རིག་པའི་ཐུན་མིན་དགོངས་དོན་དང་རྒྱ་གར་ནག་གི་རིག་པའི་གཞུང་ལུགས་དང་ལག་ལེན་མཉམ་སྤྱོད་བྱེད་དགོས་པ་གལ་ཆེན་དུ་བསྟན་པར་མ་ཟད།   མང་དུ་ཕྱེས་ནས་ནད་གཞི་མ་འདྲེས་པར་བཟུང་དགོས་ཚུལ་དང་ཉུང་དུ་བསྡུས་ལ་ལག་ལེན་གཉིས་སུ་འདྲིལ་བའི་རིགས་ལམ་མ་འདྲ་བའི་སྒོ་ནས་འཆེད་ཁྲིད་རྒྱས་པར་གནང་ངོ་། །