མཚོ་སྔོན་ཞིང་ཆེན་བོད་ལུགས་དཀའ་བཅུ་སྨན་པ་ཚད་ལྡན་གསོ་སྐྱོང་རྟེན་གཞིའི་དཔེ་ཀློག་ཁང་གིས་

༼གཡུ་ཐོག་རྟགས་མའི༽་སྐབས་གཉིས་པའི་དཔེ་ཀློག་མྱོང་ཚོར་བགྲོ་གླེང་བྱ་འགུལ་སྤེལ།

ཐེངས་འདིའི་བྱ་འགུལ་སྟེང་ཞིང་ཆེན་བོད་ལུགས་སྨན་ཁང་གི་རྒན་བཙུན་ཐར་ཡག་དང་རིན་ཆེན་དོན་གྲུབ་གཉིས་གདན་དྲངས་ཏེ་དཀའ་བཅུ་སྨན་པ་གསུམ་གྱི་དཔེ་ཀློག་མྱོང་ཚོར་ལ་མཛུབ་སྟོན་གནང་། 

ཐོག་མར་དཀའ་བཅུ་སྨན་པ་ཕག་མོ་དོན་གྲུབ་ཀྱིས་རིགས་པ་ཅན་གྱི་དཔེ་ཀློག་བརྗོད་གཞིར་བྱས་ནས་གནའ་དེང་ཟུང་འབྲེལ་གྱིས་དཔལ་ལྡན་རྒྱུད་བཞི་སློབ་སྦྱོང་བྱ་རྒྱུ་དང་། དེ་ཡང་ཐབས་ལམ་ལ་བསྟེན་ནས་ནང་དོན་རིག་པ་དང་ཚད་མ་རིག་པ། སྨན་རྩིས་ཟུང་འབྲེལ་དང་ཀྲུང་ལུགས་གསོ་རིག་བསྡུར་དཔྱོད་ཀྱིས་ཚུལ་དུ་སྦྱངས་རྒྱུ། དེང་རབས་ཀྱི་དངོས་ལུགས་དང་རྫས་འགྱུར། སྐྱེ་དངོས་སོགས་ཀྱི་ཐབས་ལམ་སྤྱད་དེ་སྦྱངས་པ་སོགས་ཀྱི་སྐོར་ནས་དཔེ་ཀློག་སྙན་ཞུ་ཕུལ་ཞིང་།  དཀའ་བཅུ་སྨན་པ་སྒོམ་པ་ཐར་གྱིས་འཚོ་བཅུད་རིག་པའི་མཐོང་སྣེ་ལས་བོད་ཀྱི་གསོ་རིག་གི་གསོ་བཅོས་སྒྱུ་རྩལ་ལ་རོབ་ཙམ་ལྟ་བ་ཞེས་པའི་གླེང་གཞི་དང་འབྲེལ་ནས་ཁ་ཟས་ཀྱི་ལེགས་པའི་གནས་སྟངས་ལས་ཅི་ཙམ་གསར་བ་ཡིན་ན་དེ་ཙམ་བཟང་བ་དང་། ཁ་དོག་ཟབ་པ། དབྱིབས་ཡོད་པ། དེང་རབས་ལས་སྲོལ་རྒྱུན་གྱི་ཟས་རྣམས་བཟང་བ་གསལ་བྱེད་ཀྱི་དཔེ་དང་སྦྱར་ནས་དཔེ་ཀློག་སྙན་ཞུ་ཕུལ་ཡོད་ཅིང་། དཀའ་བཅུ་སྨན་པ་གནམ་ལྷ་རྒྱལ་གྱིས་གསོ་བྱས་ཟས་བསྟེན་ཚུལ་སྐོར་གྱི་ཁ་བརྡ་དང་འབྲེལ་ཏེ་རྒྱུད་ལས། ཟས་སྐོམ་ལེགས་སྤྱད་ལུས་དང་སྲོག་འཚོ་ཞིང་།། དམན་ལྷག་ལོག་གྱུར་ནད་སྐྱེད་འཕྲལ་སྲོག་འཇོམས།། ཟས་སྐོམ་ལེགས་པར་གདམ་དགོས་པའི་གལ་ཆེན་རང་བཞིན་སྐོར་ནས་དཔེ་ཀློག་སྙན་ཞུ་ཕུལ་ཡོད་པ་རེད།

མཇུག་མཐར་རྒན་བཙུན་ཐར་ཡག་དང་རིན་ཆེན་དོན་གྲུབ་ལགས་རྣམ་གཉིས་ནས་ཐེངས་འདིའི་དཔེ་ཀློག་སྙན་ཞུ་ལ་དཔྱད་བརྗོད་གནང་བ་དང་། རིགས་ལམ་ཕྲ་མོ་འབྱེད་པའི་རྣམ་དཔྱོད་ཀྱི་རྩལ་བཏོན་ནས་དམ་པའི་གསུང་རབ་ཀློག་པ་དང་། དཔེ་ལྟོས་ཀྱི་གཞི་མ་འཁྲུལ་བའི་སྒོ་ནས་དཔེ་ཆའི་གདམ་གསེས་མི་ནོར་བ། ཆོད་སེམས་ཀྱི་རྣོ་མ་རྟུལ་བའི་སྒོ་ནས་དཔེ་ཀློག་ལ་གོམས་དགོས་པའི་དགོངས་འཆར་བཏོན་ཏེ་བྱ་འགུལ་ཡོངས་སུ་མཇུག་བསྒྲིལ་བའོ།།