མིད་འཆུས་སྤྱི་སྨན་གྱིས་མིད་འབྲས་ནད་པ་བཅོས་ཚུལ།

རྒྱུད་ལས། །འགྲམས་འཁྲུགས་ཁ་ཟས་མ་སྨིན་པས།། ངན་ཁྲག་རྒྱས་ཏེ་རླུང་གིས་བསྒྲིལ་ནས་འབྱུང་།། ཞེས་པ་ལྟར། རྒྱུ་རྐྱེན་གང་རུང་ལ་བརྟེན་ནས་ནང་གི་འདུ་བ་འཁྲུགས་ཏེ་ཁྲག་ངན་རྒྱས་པ་དེ་རླུང་གིས་བསྒྲིལ་བས་ལུས་ཀྱི་གནས་གང་རུང་དུ་སྐྲངས་པ་བེ་འབྲས་ལྟར་སྲ་ཞིང་མཁྲེགས་པར་འགྱུར་བའི་ནད་གདུག་པ་ཅན་ལ་འབྲས་ནད་ཞེས་བྱས་སྟེ། རྨ་དེས་མིད་པའི་གནས་སུ་བབས་ནས་ནད་འགྱུར་བྱུང་བ་ལ་མིད་འབྲས་ཟེར་ཞིང་རྟགས་སུ་ཟས་སྐོམ་མི་ཐར་ཞིང་རིམ་བཞིན་སྡུག་ཏུ་ཕྱིན་ནས་མཐར་ཆུ་ཡང་མིད་མི་ཐུབ་པ་དང་། ཟུངས་ཁྲག་ཟད་པ། ལུས་སྟོབས་ཧ་ཅང་ཉམས་ཞན་དུ་གྱུར་བ་ཞིག་ཡིན། 

ཁོང་འབྲས་ནི་སྙིང་སོགས་དོན་སྣོད་ཀྱི་ཡུལ་གང་རུང་གི་གནས་སུ་འབྱུང་ངེས་ཤིང་། ནད་ཀྱི་རྒྱུའི་ངོས་ནས་བརྗོད་ན། གཙོ་བོ་ཟས་སྐོམ་ཐོག་མར་མྱགས་ཞུ་དྭངས་སྙིགས་བྱེད་སའི་སྣོད་སྟེ། ཕོ་བའི་ཡུལ་དུ་འབྱུང་བ་ཡིན། དེ་ཡང་ཕོ་བ་དང་མིད་པའི་འབྲེལ་མཚམས་དང་། ཕོ་བ་དང་རྩམ་ལོང་ཐད་ཀྱི་འབྲེལ་མཚམས་ཏེ་དོན་དུ་ཕོ་བ་དང་རྒྱུ་མའི་སྟོད་ཀྱི་འབྲེལ་མཚམས་རྣམས་སུ་བྱུང་བ་མང་བས། ནད་ཀྱི་རྗེས་གཅོད་ཙམ་མིན་པར་རྒྱུན་དུ་ཕོ་བའི་ཁ་འཛིན་དུ་སེ་འབྲུའི་རིགས་སྦྱོར་བ་ལ་བསྟེན་ནས་མེ་དྲོད་གསོ་བ་གཅེས་པར་གདམས་པ་ཡིན།

【སྨན་མིང་།】མིད་འཆུས་སྤྱི་སྨན།

【རང་བཞིན།】ཅུང་དྲོད། 

【ཕན་ནུས།】ཕན་ཡོན་མིད་འཆུས་ཕོ་བར་བབས་པ་དང་། །གྲེ་ཐོག་སྤུ་ཐོག་ཕོ་ཐོག་ཚ་འགགས་རྣམས། །འདི་ཡིས་མི་སེལ་ནད་ནི་ཡོད་མ་ཡིན། །

【སྦྱོར་སྡེ།】རྡོ་ཐལ་ཚ་འདུལ་དང་། ཅུ་གང་། གུར་ཀུམ། ལི་ཤི ཛཱ་ཏི། སུག་སྨེལ། ཀ་ཀོ་ལ། ཨ་རུ་གསེར་མདོག གླ་རྩི། དོམ་མཁྲིས། རྒྱམ་ཚྭ། ད་ལིས། མ་ནུ། འུ་སུ། སྐྱུ་རུ་ར། ཧོང་ལེན། བ་ཤ་ཀ ཙན་དན་དམར་པོ། ཏིག་ཏ། གསེར་གྱི་མེ་ཏོག དུག་མོ་ཉུང་། ཅོང་ཞི། བུལ་ཏོག་ཆུ་བཅད། གངས་ཐིགས་བཙོ་བཀྲུ། ཚ་ལ་ཆུ་བཅད། བྲག་ཞུན། གི་ཝང་། རྒྱམ་ཚྭ། པི་པི་ལིང་། སེ་འབྲུ་རྣམས་སྦྱར་བའོ།