༄༅། །༢༠༢༠ལོའི་ཆེད་ལས་ཤེས་རམས་ཞིབ་འཇུག་སློབ་མས་སློབ་དཔོན་བསྟེན་པའི་མཛད་སྒོ་མཚོ་སྔོན་ཞིང་ཆེན་བོད་ལུགས་སྨན་ཁང་དུ་བསྡུས།
སྤྱི་ཟླ་༡༡པའི་ཚེས་༢༥ཉིན་གྱི་ཕྱི་དྲོར།༢༠༢༠ལོའི་ཆེད་ལས་ཤེས་རམས་ཞིབ་འཇུག་སློབ་མས་སློབ་དཔོན་བསྟེན་པའི་མཛད་སྒོ་མཚོ་སྔོན་ཞིང་ཆེན་བོད་ལུཊ་སྨན་ཁང་དུ་འཚོགས། ཐེངས་འདིའི་ཚོགས་འདུ་ནི་མཚོ་སྔོན་ཞིང་ཆེན་བོད་ལུགས་སྨན་ཁང་གི་ནད་ཐོག་སློབ་གཉེར་ཚན་ཁག་གིས་གཙོ་སྒྲུབ་བྱས། ཚོགས་འདུའི་སྟེང་སྨན་ཁང་གི་འགོ་གཙོ་དང་། ཆེད་མཁས་པ། ཞིབ་འཇུག་སློབ་མའི་མཛུབ་སྟོན་སློབ་དཔོན། ༢༠༡༨ལོ་དང་། ༢༠༡༩ལོ། ༢༠༢༠ལོ་བཅས་ཀྱི་ཆེད་ལས་ཤེས་རམས་ཞིབ་འཇུག་སློབ་མ་སོགས་མི་སྣ༤༠ལྷག་ཞུགས། མཛད་སྒོ་ལ་མཚོ་སྔོན་ཞིང་ཆེན་བོད་སྨན་ཁང་གི་འགོ་གཙོ་གཞོན་པ་པདྨ་རབ་བརྟན་ལགས་ཀྱིས་མདོ་འཛིན་གནང་། ཐོག་མར་རང་སྨན་ཁང་གི་ཞིབ་འཇུག་སློབ་མའི་མཛུབ་སྟོན་སློབ་དཔོན་རྣམས་མཚམས་སྦྱོར་དང་། དེ་ནས་ད་ལོའི་ཆེད་ལས་ཤེས་རམས་ཞིབ་འཇུག་སློབ་མ་གསར་བ་བཅུ་དགུས་རེ་རེ་ནས་རང་ཉིད་ངོ་སྤྲོད་བྱས། མཚོ་སྔོན་ཞིང་ཆེན་བོད་ལུགས་སྨན་ཁང་གི་སྨན་པ་འབུམ་རམས་པ་ལྷ་མཁར་རྒྱལ་གྱིས་མཛུབ་སྟོན་སློབ་དཔོན་རྣམས་ཀྱི་ཚབ་བྱས་ཏེ་གསུང་བཤད་གནང་། ཐོག་མར་ད་ལོའི་ཆེད་ལས་ཤེས་རམས་ཞིབ་འཇུག་སློབ་མ་རྣམས་ལ་རྟེན་འབྲེལ་དང་དགའ་བསུ་མཉམ་གཅིག་ཏུ་ཞུ་ཞོར། མཚོ་སྔོན་ཞིང་ཆེན་བོད་ལུགས་སྨན་ཁང་གི་ངོ་སྤྲོད་ཁ་གསལ་ཞིང་གནད་བསྡུས་པ་ནས་གླེང་བསླངས་ཏེ། ཚང་མས་མཉམ་དུ་བོད་ཀྱི་གསོ་བ་རིག་པའི་འཛིན་སྐྱོང་སྤེལ་གསུམ་ཐད་ལ་ཤུགས་རྒྱག་དགོས་པ་དང་། ལྷག་པར་དུ་རྒྱལ་སྨན་ཆེན་མོ་ཨ་ཁུ་ཉི་མ་ལགས་ཀྱི་ཀུན་སྤྱོད་དང་སྙིང་སྟོབས་སོགས་ལ་སློབ་སྦྱོང་བྱེད་དགོས་པའི་སྐུལ་མ་བཏང་། མཛུབ་སྟོན་སློབ་དཔོན་རྣམས་ཀྱིས་ཀྱང་ནད་ཐོག་ལག་ལེན་སྐོར་ནས་བུམ་པ་གང་བྱོའི་ཚུལ་དུ་དམར་ཁྲིད་གནང་རྒྱུའི་ཆོད་སེམས་བཅིངས། ཆེད་ལས་ཤེས་རམས་ཞིབ་འཇུག་སློབ་མ་གསར་བ་ལྷ་སྐྱབས་རྒྱལ་གྱིས་སློབ་གྲོགས་ཡོངས་ཀྱི་ཚབ་བྱས་ཏེ་མཛུབ་སྟོན་སློབ་དཔོན་རྣམས་ལ་བཀའ་དྲིན་ཞུ་བ་དང་། སློབ་གཉེར་ཧུར་བརྩོན་འབད་ཐག་བྱ་རྒྱུའི་དམ་བཅའ་བཞག མཇུག་མཐར། མཚོ་སྔོན་ཞིང་ཆེན་བོད་ལུགས་སྨན་ཁང་གི་འགོ་གཙོ་གཞོན་པ་པདྨ་རབ་བརྟན་ལགས་ཀྱིས་མཛུབ་སྟོན་སློབ་དཔོན་རྣམས་ཀྱིས་འགན་འཁྲི་དང་ལེན་སྒོས་མཛུབ་ཁྲིད་བྱེད་དགོས་པ་དང་། སློབ་མ་རྣམས་ཀྱིས་ཀྱང་སློབ་གཉེར་ཁྲོད་རང་ཉིད་ཀྱི་བདེ་འཇགས་དང་ནད་ཡམས་སྔོན་འགོག་སོགས་ལ་མཉམ་འཇོག་བྱེད་དགོས་པ་དང་། ལྷག་པར་དུ་སྤྱོད་བཟང་ཚུལ་མཐུན་སྒོས་སློབ་གཉེར་ལེགས་པོ་བྱས་ཏེ་བདེ་ལེགས་ངང་སློབ་མཐར་ཕྱིན་པར་སྨོན་འདུན་ཞུས་པ་དང་བཅས་ཚོགས་འདུའི་མཇུག་བསྡུས།
关注公众号