སྤྱི་ལོ་༢༠༢༠ལོའི་༡༢པའི་ཚེས༩ཉིན་བོད་ལུགས་གསོ་རིག་ཀླད་ནད་སྐོར་གྱི་གདེང་ཐོབ་ནད་སྣའི་བརྟག་གཞིག་ཇུས་གཞི་ཞིབ་འཇུག་དཔྱད་གླེང་གྲོས་ཚོགས་འཐུས་སྒོ་ཚང་བའི་སྒོ་ནས་གནའ་མཁར་ཟི་ལིང་དུ་འཚོགས།ཐེངས་འདིའི་ཀླད་ནད་ཀྱི་དཔྱད་གླེང་ཚོགས་འདུར་མཚོ་སྔོན་ཞིང་ཆེན་བོད་ལུགས་སྨན་ཁང་ཀླད་ནད་ཚན་ཁག་གིས་གཙོ་སྒྲུབ་བྱས་ཤིང་།ཀྲུང་བོད་སྨན་དོན་དོ་དམ་ཅུས་རྒྱབ་སྐྱོར་དང་ཐུགས་ཁུར་འོག་བོད་ལྗོངས་སྨན་རྩིས་ཁང་གི་རྒན་བུ་ཆུང་ཚེ་རིང་ལགས་གཙོ་བྱས་བོད་ལྗོངས་དང་མཚོ་སྔོན་ཞིང་ཆེན་ནང་ཁུལ་གྱི་ཆེད་མཁས་ཉི་ཤུ་ལྷག་ཐེངས་འདིའི་བརྟག་གཞིག་དཔྱད་གླེང་གྲོས་ཚོགས་ལ་ཞུགས།
བོད་ལྗོངས་སྨན་རྩིས་ཁང་ཚན་ཞིབ་ཁྲུའུ་ཁྲུའུ་ཀྲང་། ཡོན་ཀྲང་ཕྱག་རོགས། བོད་ལྗོངས་ཚད་ལྡན་འཛུགས་སྐྲུན་ཨུ་ཡོན་ལྷན་ཚོགས་གྱི་དྲུང་ཡིག་ཆེན་མོ་བུ་ཆུང་ཚེ་རིང་ལགས་དང་། ལྗོངས་སྨན་རྩིས་ཁང་གི་ཀླད་ནད་ཚན་ཁག་གི་ཚན་གཙོ་སྐལ་བཟང་ཕུན་ཚོགས། མཆིན་ནད་ཚན་ཁག་གི་ཚན་གཙོ་བདེ་ཆེན་པད་སྒྲོན། བོད་ལྗོངས་ཚད་ལྡན་འཛུགས་སྐྲུན་ཨུ་ཡོན་ལྷན་ཚོགས་ཀྱི་ནད་མིང་དང་ཚབ་རྟགས་གཅིག་གྱུར་ཞིབ་འཇུག་རྣམ་གྲངས་ཀྱི་འགན་ཁུར་བ་ཕུར་བུ་བཀྲ་ཤིས། མཚོ་སྔོན་ཞིང་ཆེན་བོད་ལུགས་སྨན་ཁང་སྨན་དོན་ཚན་ཁག་གི་ཚན་གཙོ་གཞོན་པ་པདྨ་རིན་ཆེན་དང་། དཔྱད་བཅོས་ཚན་ཁག སྐྲན་ནད་ཚན་ཁག ཕོ་མཆེར་ཚན་ཁག མཆིན་མཁྲིས་ཚན་ཁག་བཅས་ཀྱི་ཚན་གཙོ་དང་སྙིང་ནད་ཚན་ཁག མཚོ་སྔོན་གསོ་རིག་སློབ་གླིང་གི་འཐུས་ཚབ་མི་སྣ་བཅས་ཐེངས་འདིའི་དཔྱད་གླེང་ཚོགས་འདུར་ཞུགས།
ཐོག་མར་ཀླད་ནད་ཚན་ཁག་གི་ཚན་གཙོ་ལྕགས་བྱམས་ཚེ་རིང་གཙོ་བྱས་པའི་ལས་ཐོག་པས་ཀླད་ནད་ཀྱི་སྐོར་ནས་མིག་སྔར་གྱི་གནས་ཚུལ་དང་དཀའ་ཁག མ་འོངས་པར་གདེང་ཐོབ་ནད་སྣའི་བརྟག་གཞིག་ཇུས་གཞི་ཚད་གཞི་འཐུས་ཚང་དུ་གཏོང་དགོས་ཚུལ་དང་། ཆེད་ལས་ཚན་ཁག་གི་ཆེད་བཅོས་ནད་ཀྱི་རྨང་གཞི་སྲ་བརྟན་དུ་ཇི་ལྟར་གཏོང་དགོས་པའི་སྐོར་གྱི་གྲོས་གཞི་བཏོན་ཞིང་། གྲོས་གཞི་ཐད་ཀླད་ནད་བརྟག་གཞིག་ཇུས་གཞིའི་ཇུས་འགོད་ཐད་ཀྱི་གྲོས་མོལ་དང་སྦྲགས་བོད་ལུགས་གསོ་རིག་རང་གི་བརྟག་གཞིག་གསོ་རིག་ལྟེ་གནས་དང་། གཞི་གྲངས་གྲངས་མཛོད་ཀྱི་འཛུགས་སྐྲུན། ནད་ཐོག་ཞིབ་འཇུག་གི་རྣམ་གྲངས་།ཆེད་མཁས་བར་གྱི་བགྲོ་གླེང་གི་ལས་སྟེགས་སོགས་ཕྱོགས་ཡོངས་ནས་མ་ལག་ཅན་དང་ཚད་ལྡན་ཅན་ཏུ་མངོན་འགྱུར་ཡོང་བར་དམིགས་ཏེ་རྒན་བུ་ཆུང་ཚེ་རིང་ལགས་ཀྱིས་ཚན་རིག་ཞིབ་འཇུག་གི་མ་ལག་འཛུགས་སྐྲུན་ཐད་ཡིག་ཚང་དཔྱད་ཞིབ་དང་། ནད་ཐོག་ཞིབ་འཇུག་ཁྲོད་ཀྱི་མི་སྒེར་ཉམས་མྱོང་དང་།ནད་ཐོག་བདེན་དབང་།ནད་པའི་འདོད་བློ་སོགས་ཀྱི་སྒོ་ནས་བརྟག་གཞིག་གསོ་རིག་གི་ལས་གཞི་ཇི་ལྟར་སྤེལ་བའི་སྐོར་ནས་མཛུབ་སྟོན་གལ་ཆེན་གནང་།
གཞན་ཆེད་མཁས་པ་སྨན་པ་སྐལ་བཟང་ཕུན་ཚོགས་དང་ཕུར་བུ་བཀྲ་ཤིས།བདེ་ཆེན་པད་སྒྲོན་སོགས་ཀྱིས་ཚོགས་འདུའི་སྟེང་རྒྱུན་མཐོང་གི་ནད་གཞིའི་ངོས་འཛིན་དང་གསོ་བཅོས་གནད་ཁེལ།ཕན་སྐྱེད་ཀྱི་གྲངས་འབོར་ཀྱང་མངོན་གསལ་ལྡན་པ་གཙོ་བྱས་པའི་ནད་སྣའི་ཞིབ་འཇུག་བྱེད་པ་སྤྱིའི་གླེང་གཞིར་བཟུང་སྟེ།སྐབས་དོན་ཕྱི་ལུགས་གསོ་རིག་གི་ནད་མིང་དང་སྦྱར་དུས་ཕྱོགས་མཚུངས་བའི་སྒོ་ནས་བོད་ལུགས་གསོ་རིག་གི་ནད་མིང་གདགས་ལུགས་དང་རྒྱུ་རྐྱེན།གྱུར་ཚུལ།དབྱེ་བ།རྟགས་དང་བཅོས་ཐབས།བླ་གཉན་སོགས་གང་ཡོད་སོ་སོའི་དཔྱད་བསྡུར་བརྒྱུད་ཐ་མར་གྲོས་ཐག་གཅིག་ཏུ་བབས་སྟེ་ལས་གཞི་སྤེལ་ན་ཀུན་གྱིས་ངེས་ལེན་དང་ར་སྤྲོད་ཐུབ་པ་དང་།དེ་མིན་ནད་རྟགས་འདྲ་བ་ཁོ་ནར་བཟུང་ནས་ཕན་ཚུན་མཐུན་སྦྱོར་བགྱིས་ན་ངེས་བ་མེད་པས་འཕེལ་རྒྱས་ཡིན་མིན་གྱི་དོགས་གཞི་དང་།གཙོ་བོ་གྱུར་ཚུལ་ཆ་འདྲ་མིན་དང་རྟགས་ཆ་འདྲ་མིན།བཅོས་ཐབས་ཆ་འདྲ་མིན་སོགས་བོད་ལུགས་གསོ་རིག་གི་གསོ་ཚུལ་གྱི་རྩ་དོན་གཞིར་བཟུང་ནས་མུ་མཐུད་ཞིབ་འཇུག་བྱེད་པ་བརྒྱུད་འཐུས་སྒོ་ཇེ་ཚང་དུ་གཏོང་དགོས་པའི་རེ་བ་དང་བཅས་ཐེངས་འདིའི་དཔྱད་གླེང་གྲོས་ཚོགས་ལ་སྤྱི་བསྡོམས་མཛད།
关注公众号