གཅིན་པར་ཁྲག་བབས་པའི་ནད་རིགས་ཀྱི་རྒྱུ་རྐྱེན་སྐོར་གླེང་བ།

༢༠༢༡ལོའི་ཟླ༣པའི་ཚེས་༡༢ནི་འཛམ་གླིང་གི་མཁལ་མ་གསོ་བའི་ཉིན་མོ་ཐེངས་བཅུ་དྲུག་པ་ཡིན། དེ་ཡིས་དོན་ལྔའི་ཡ་གྱལ་མཁལ་མ་ནི་མིའི་ལུས་ཕུང་གི་བདེ་ཐང་དང་ཚེ་སྲོག་ལ་སྒོ་ཀུན་ནས་གལ་འགངས་ཆེ་བ་བསྟན་ཡོད་ལ། སྡོམ་རྩིས་བྱས་པ་ལྟར་ན་ད་ལྟ་འཛམ་གླིང་སྟེང་དར་མའི་མཁལ་མའི་ནད་བྱུང་ཚུལ་ནི་ 10.8% དང་ཚེ་སྲོག་ཤོར་ཚད་ནི་12.5% ཡིན་པས། མི་བཅུའི་ནང་གི་གཅིག་ལ་མཁལ་མའི་ནད་བྱུང་ཡོད་པ་ར་སྤྲོད་བྱས་ཡོད།   དེ་བས་དེ་རིང་གི་ཉིན་མོ་འདིར་ངེད་ཁོང་ནད་ཚན་ཁག་ནས་༼འཛམ་གླིང་མཁལ་མ་གསོ་བའི་ཉིན་མོ་ལ།།  མཁལ་མ་བདེ་ཐང་ཡོང་བར་ཀུན་ནས་འབད། །༽ཅེས་པ་བརྗོད་གཞིར་བདམ་ནས་འཆད་ཁྲིད་འདི་སྤེལ་བ་ཡིན།

ཕྱི་དྲོའི་ཆུ་ཚོད་གཅིག་དང་ཕྱེད་ཀའི་རིང་རང་སྨན་ཁང་གི་སྨན་པ་འབུམ་རམས་གཞོན་པ་དབང་གྲགས་བསོད་ནམས་ལགས་ནས་བརྗོད་བྱང་ལ༼གཅིན་པར་ཁྲག་བབས་པའི་ནད་རིགས་ཀྱི་རྒྱུ་རྐྱེན་སྐོར་གླེང་བ༽ཞེས་པའི་རིག་གཞུང་འཆད་ཁྲིད་གནང་བ་ལས་གཙོ་ཆེར་སྨན་སོགས་བཅོས་ཀ་བཏང་གཅོད་སོགས་ལས་བརྩམས་ཏེ་མན་ངག་རྒྱུད་སྐབས་སུ་ནད་རྟགས་ག་ཚོད་ཡོད་པ་ངོ་སྤྲོད་བྱས་པ་དང་།རྒྱུད་ཀྱི་ལེའུ་རེ་རེ་མཁལ་མ་དང་འབྲེལ་བའི་ནད་རྟགས་སོ་སོ་དང་མི་ནོར་བའི་གཟེར་སོགས་རིགས་ལམ་གཞི་གསུམ་གྱི་སྒོ་ནས་ངོ་སྤྲོད་གནངས། ནད་ཀྱི་ངོས་ནི་རྟགས་ལ་བཟུང་ཞེས་པ་གལ་ཆེན་ཡིན་པ་དང་། སྨན་པ་མཁས་མིན་རྩ་ཆུ་བརྟག་ལས་ཤེས།། སྨན་པ་མཆོག་མིན་དྲི་བ་ངོས་བཟུང་གཅེས།། སྨན་པ་ཡིན་མིན་གསོ་བའི་ཚུལ་ལ་ལྟོས།། ནད་པ་གཅེས་པར་འཛིན་པ་སྨན་པ་ཡིན།། ཅེས་སྨན་པའི་ཀུན་སྤྱོད་ལས་བོད་ཀྱི་སྨན་པ་ཚད་ལྡན་གྱི་གཞི་འཛིན་སར༼གསོ་རིག་རྒྱུད་བཞི་གཞུང་གི་ཞིང་ས་རུ།། ཉེས་གསུམ་རིག་པའི་ས་བོན་བཏབ་པས་ཀྱང་།། ལག་ལེན་ཇི་བཞིན་སོ་ནམ་མ་སྦྱོང་ན།། ལུས་སེམས་ཕན་བདེ་འབྲས་བཟང་ཅི་ལ་སྨིན།།༽ཞེས་གསུངས་པ་ལྟར།  ནད་ཐོག་སྐབས་སུ་ནད་པར་ཕན་ཐོག་དགོས་ན་དུས་དང་རྣམ་པ་ཀུན་ཏུ་ནད་ཐོ་འབྲི་དུས་དཔྱད་འཕྲང་བསལ་བ་དང་། ནད་གཞི་ངོས་འཛིན། གསོ་ཚུལ་བཅས་འགོད་དུས་ཆེས་ཉུང་མཐར་སྐར་མ་ལྔ་ཙམ་ལ་བསམ་བློ་གཏོང་དགོས་པ་དང་དུས་ནམ་ཡང་རང་ཉིད་ཀྱི་ཐོས་བསམ་ལ་འབད་དགོས་པ། ལྷག་པར་དུ་ནད་པར་འབྲེལ་འདྲིས་ཀྱི་སྒོ་ནས་ཐོས་པ་བྱེད་རྒྱུ་ནི་གལ་ཆེན་ཡིན་པ། ང་ཚོ་བོད་ཀྱི་སྨན་པ་སུ་ཡིན་ཡང་བོད་ལུགས་གསོ་རིག་གི་གཞུང་གི་ཕྱི་མོའམ་རྩ་བ་དཔལ་ལྡན་རྒྱུད་བཞིའི་གཞུང་གི་དངོས་བསྟན་ལ་གོ་བ་ཟབ་མོ་ཆགས་ནས་གཞི་རྟགས་གསོ་གསུམ་སོགས་གསོ་བ་རིག་པའི་རིག་པའི་རྨང་གཞིའི་སྡོམ་ཆིངས་དགྲོལ་ནས་སྐབས་བཅོ་ལྔ་དང་གནས་བཅུ་གཅིག མདོ་བཞི་ལ་སོགས་པའི་བོད་ལུགས་གསོ་རིག་གི་རྩ་བའི་རིགས་ལམ་དེད་དེ་ཉེས་པ་གསུམ་ནས་བརྩམས་ཏེ་མ་ཞུ་གསར་རྙིང་། གཅོང་སྡེ་བཞི།  སྐྱ་འོར་དམུ་གསུམ། སྨུག་པོའི་རྣམ་འགྱུར་བཅུ་གསུམ། ཚ་བ་གཉན་རིམས། མཚོན་རྨ་ཐོར་ནད་ལ་སོགས་གང་ཡང་བོད་ལུགས་གསོ་རིག་གི་ནད་ཐོག་ལག་ལེན་གྱི་རིགས་ལམ་ལྟར་གསོ་ཚུལ་གྱི་འཇོག་ཚུལ་ཐུན་མོང་མ་ཡིན་པར་གཞི་བཅས་ནད་རྟགས་གསལ་བར་འབྱེད་ནས་ནད་གཞི་ངོས་འཛིན་དང་བཅོས་ཐབས་འཁྲུལ་མེད་ཀྱི་སྒོ་ནས་གསོ་རིག་གི་བསྟན་པ་སྤེལ་ནས་ནད་པར་འགན་ལེན་རྒྱུ་ནི་གནད་ཀྱི་དམ་པ་ཡིན་པར་གསུངས་ཡོད་དོ། །