མཆིན་པའི་ཟགས་ཆུ་དང་གཟའ་གྲིབ་བསྐྱར་གསོའི་ནད་ཐོག་ཞིབ་འཇུག་རྣམ་གྲངས་དུས་སྐེད་སྐུལ་འདེད་ཚོགས་འདུ་དང་ནད་ཐོག་བརྟག་བཅོས་ཕྱོགས་སྟོན་རིགས་སྒྲུབ་དཔྱད་འཇོག་ཚོགས་འདུ་ཟི་ལིང་ནས་ཚོགས།
སྤྱི་ལོ་༢༠༢༠ལོའི་༡༢པའི་ཚེས༨ཉིན་མཆིན་པའི་ཟགས་ཆུ་དང་གཟའ་གྲིབ་བསྐྱར་གསོའི་ནད་ཐོག་ཞིབ་འཇུག་རྣམ་གྲངས་དུས་སྐེད་སྐུལ་འདེད་ཚོགས་འདུ་དང་ནད་ཐོག་བརྟག་བཅོས་ཕྱོགས་སྟོན་རིགས་སྒྲུབ་དཔྱད་འཇོག་ཚོགས་འདུ་འཐུས་སྒོ་ཚང་བའི་སྒོ་ནས་གནའ་མཁར་ཟི་ལིང་དུ་ཚོགས། ཐེངས་འདིའི་རིགས་སྒྲུབ་དཔྱད་འཇོག་ཚོགས་འདུ་ལ་མཚོ་སྔོན་ཞིང་ཆེན་བོད་ལུགས་སྨན་ཁང་ཀླད་ནད་ཚན་ཁག་དང་མཆིན་མཁྲིས་ཚན་ཁག་གཉིས་ནས་གཙོ་སྒྲུབ་བྱས་ཤིང་། བོད་ལྗོངས་སྨན་རྩིས་ཁང་གི་རྒྱབ་སྐྱོར་དང་ཐུགས་ཁུར་འོག་ལྗོངས་སྨན་རྩིས་ཁང་གི་རྒན་བུ་ཆུང་ཚེ་རིང་ལགས་གཙོ་བྱས་བོད་ལྗོངས་དང་མཚོ་སྔོན་ཞིང་ཆེན་ནང་ཁུལ་གྱི་ཆེད་མཁས་ཉི་ཤུ་ལྷག་ཚོགས་འདུར་ཞུགས།
བོད་ལྗོངས་སྨན་རྩིས་ཁང་ཚན་ཞིབ་ཁྲུའུ་ཁྲུའུ་ཀྲང་།ཡོན་ཀྲང་ཕྱག་རོགས།བོད་ལྗོངས་ཚད་ལྡན་འཛུགས་སྐྲུན་ཨུ་ཡོན་ལྷན་ཚོགས་གྱི་དྲུང་ཡིག་ཆེན་མོ་བུ་ཆུང་ཚེ་རིང་ལགས་དང་།ལྗོངས་སྨན་རྩིས་ཁང་གི་ཀླད་ནད་ཚན་ཁག་གི་ཚན་གཙོ་སྐལ་བཟང་ཕུན་ཚོགས།མཆིན་ནད་ཚན་ཁག་གི་ཚན་གཙོ་བདེ་ཆེན་པད་སྒྲོན།བོད་ལྗོངས་ཚད་ལྡན་འཛུགས་སྐྲུན་ཨུ་ཡོན་ལྷན་ཚོགས་ཀྱི་ནད་མིང་དང་ཚབ་རྟགས་གཅིག་གྱུར་ཞིབ་འཇུག་རྣམ་གྲངས་ཀྱི་འགན་ཁུར་བ་ཕུར་བུ་བཀྲ་ཤིས།མཚོ་སྔོན་ཞིང་ཆེན་བོད་ལུགས་སྨན་ཁང་སྨན་དོན་ཚན་ཁག་གི་ཚན་གཙོ་གཞོན་པ་པདྨ་རིན་ཆེན་དང་།དཔྱད་བཅོས་ཚན་ཁག སྐྲན་ནད་ཚན་ཁག ཕོ་མཆེར་ཚན་ཁག མཆིན་མཁྲིས་ཚན་ཁག་བཅས་ཀྱི་ཚན་གཙོ་དང་སྙིང་ནད་ཚན་ཁག མཚོ་སྔོན་གསོ་རིག་སློབ་གླིང་གི་འཐུས་ཚབ་མི་སྣ་བཅས་ཐེངས་འདིའི་དཔྱད་འཇོག་ཚོགས་འདུར་ཞུགས།
ཐོག་མར་མཆིན་མཁྲིས་ཚན་ཁག་ཚན་གཙོ་ལྷ་མཁར་རྒྱལ་ལགས་ནས་འགོ་འཛིན་དང་བོད་ལྗོངས་སྨན་རྩིས་ཁང་གི་མཆིན་ནད་ཚན་ཁག་ཚན་གཙོ་བདེ་ཆེན་པད་སྒྲོན་ལགས་ནས་མཆིན་ཁྲག་སྨུག་པོ་རྒྱས་པའི་མཆིན་ནད་དུག་ཐབས་ཀྱི་ནད་ཐོག་ཞིབ་འཇུག་གི་ཞིབ་ཚགས་དང་ཞིབ་འཇུག་ལག་ལེན་ཁྲོད་ཀྱི་དཀའ་གནད་བཀྲོལ་ཞིང་། ཀླད་ནད་ཚན་ཁག་གི་ཚན་གཙོ་ལྕགས་བྱམས་ཚེ་རིང་གཙོ་བྱས་པའི་ལས་ཐོག་པས་གཟའ་གྲིབ་ནད་ཀྱི་བརྟག་བཅོས་ལས་གཟའ་གྲིབ་ནད་ཀྱི་རིགས་དབྱེ་དང་། བཅོས་བསྐྱེད་ཚད་གཞི། ནད་ཐོག་བརྟག་བཅོས་ཕྱོགས་སྟོན་སོགས་ཀྱི་ནང་དོན་ཆེད་མཁས་རྣམ་པར་སྙན་ཞུ་ཕུལ་ནས་རིགས་སྒྲུབ་དཔྱད་འཇོག་དང་ཞིབ་བཤེར་བྱས།
ཆེད་མཁས་རྣམ་པའི“中风后遗症”གཙོ་བྱས་པའི་ཕྱི་ལུགས་གསོ་རིག་ནད་སྣའི་ཞིབ་འཇུག་བྱེད་པ་སྤྱིའི་གླེང་གཞིར་བཟུང་སྟེ། སྐབས་དོན་ཕྱི་ལུགས་གསོ་རིག་གི་ནད་མིང་དང་སྦྱར་དུས་ཕྱོགས་མཚུངས་བའི་སྒོ་ནས་བོད་ལུགས་གསོ་རིག་གི་ནད་མིང་གི་གདགས་ལུགས་དང་དེའི་རྒྱུ་རྐྱེན། གྱུར་ཚུལ་དང་དབྱེ་བ། རྟགས་དང་བཅོས་ཐབས། དེ་མིན་བླ་གཉན་སོགས་གང་ཡོད་སོ་སོའི་དཔྱད་བསྡུར་གང་མང་བརྒྱུད་མཐར་གྲོས་ཐོག་གཅིག་ཏུ་བབས་སྟེ་གཟའ་གྲིབ་ནི་ནད་རྒྱུ་ནད་མིང་ལ་བཏགས་ཤིང་། ནད་འགྱུར་གཙོ་བོ་རྩ་དཀར་ནག་གི་ངོ་བོའི་ནུས་པ་འགྲིབ་པར་བྱས་ནས་ཁྲག་གྲིབ་དང་རླུང་གྲིབ་ཀྱི་ངོ་བོའི་དབྱེ་བ་དང་། འབྱུང་བའི་ངོ་བོ་སྦྱར་ནས་མེ་གཟའ་ཆུ་གཟའ་ལ་ཚ་གྲང་གི་ངོ་བོའི་ཁྱད་ཆོས་དང་བཅས་གཅིག་གྱུར་གྱི་ངོས་འཛིན་བྱས། མཐའ་མར་རྒན་བུ་ཆུང་ཚེ་རིང་ལགས་ནས་གཟའ་གྲིབ་ནད་ཀྱི་རྒྱུ་རིགས་བྱེད་ཀྱི་གཏམ་རྒྱུད་དང་འབྲེལ་ནས་ནད་མིང་གི་བྱུང་རིམ་དང་ངོ་བོ། ནད་འགྱུར་ངོ་བོ། གསོ་ཚུལ་དང་བཅས་དེང་རབས་གསོ་རིག་དང་བསྡུར་ནས་རང་ཅག་ལྟ་གྲུབ་ཚན་རིག་ཅན་ཡིན་པའི་བསྒྲུབ་བྱ་ལུང་དང་བཅས་ངོ་སྤྲོད་གང་ལེགས་བྱས་ཤིང་། ད་དུང་མུ་མཐུད་དུ་ཡིག་ཚང་ཞིབ་འཇུག་དང་ནད་ཐོག་བདེན་དབང་བརྒྱུད་ནད་ཐོག་གི་ཞིབ་འཇུག་ལས་གཞི་གང་མང་སྤེལ་བའི་རེ་བ་དང་བཅས་ཚོགས་འདུ་མཇུག་བསྡུས།།
关注公众号